اقتصاد الخبير الاقتصادي آرام بالحاج يرد على وزيرة المالية: البدائل موجودة وعلى الوزارة تعبئة الموارد بعيدا على جيوب التوانسة الغلابه
نشر في 15 نوفمبر 2026 (10:27)
في ردّ على تصريح وزيرة المالية الذي دعت فيه إلى تقديم مقترحات لتوفير موارد جبائية إضافية للدولة، قدّم الخبير الاقتصادي آرام بالحاج جملة من المقترحات العملية، مدعّمة بأرقام تقديرية، قال إنها من شأنها تعبئة موارد مالية هامة دون الترفيع في نسب الضرائب أو إثقال كاهل المواطنين.
واعتبر بالحاج أن الإشكال لا يكمن بالضرورة في نقص الموارد، بقدر ما يرتبط بضعف الاستخلاص وغياب الحوكمة وحسن توظيف الإمكانات المتاحة.
ثم نشر بالحاج ستة مقترحات، قدّر أن عائداتها الجملية يمكن أن تبلغ نحو 2.5 مليار دينار.
وهذا نص تدوينته:
"مرّة أخرى، ميساجي للسيدة وزيرة المالية اللي قالت: "اللي عندو موارد جبائية أخرى يجيبها".
أيّا سيدتي، هاذي محاولة أولى، بأرقام تقريبية، ومن غير ما نزيدو في حتى نسبة ضريبة:
1- ترخيص سفر إلكتروني للسوّاح الأجانب اللي يدخلو من غير فيزا، ونعفيو منو المغاربيين: قريب 100 دينار على كل زائر، على قريب 3 ملايين زائر، يجيبو حوالي 250 مليون دينار صافية بعد الإعفاءات. وراهو باش نطبّقو على الزائر كيف ما باش يطبّق علينا الاتحاد الأوروبي بنظام ETIAS.
2- تسوية وضعية الموتورات: عنا في البلاد قريب زوز ملايين موتور، أغلبهم موش مسجّلين وموش مأمّنين. معلوم جولان رمزي بـ25 دينار، مربوط بالتسجيل والتأمين، يجيب حوالي 50 مليون دينار، وزيد ينقّص من حوادث الطرقات.
3- استخلاص الديون الجبائية المتخلّدة: محكمة المحاسبات حسبت أكثر من 10 مليار دينار ديون جبائية ما تخلّصتش، وهذا بأرقام 2019. كان نستخلصو منهم 20% برك، يجيبو حوالي 2000 مليون دينار.
4- مقاومة تهريب الدخان بالوسم الجبائي وتتبّع الباكوات: السوق الموازية فيها قريب ربع الاستهلاك. كان نقصّوها، تدخل حوالي 100 مليون دينار في العام.
5- تثمين الأراضي الدولية الفلاحية: الدولة عندها 500 ألف هكتار، والمكرّي منهم بعقود 38% برك. نراجعو معاليم الكراء ونكرّيو الأراضي المهملة بالبتّة العمومية، تجيب حوالي 50 مليون دينار.
6- مراجعة النظام التقديري: أكثر من 500 ألف مطالب بالضريبة يخلّصو في المعدّل 110 دينار في العام. إصلاح بالشوية وبالعدل يجيب حوالي 50 مليون دينار.
هاذم برك يجيبو حوالي 2500 مليار.
هذا الكل، ومازلنا ما حكيناش على الامتيازات الجبائية، اللي تفوت 4 آلاف مليار في العام وحتى حدّ ما يقيّم مردودها بطريقة جدّية.
في كلمة للسيدة الوزيرة: البدائل موجودة، والمشكل في الاستخلاص والحوكمة أكثر ملّي هو في قلّة الموارد. والمطلوب موش النواب ولا الخبراء هوما اللي يجيبو الموارد. المطلوب الوزارة تنشر المعطيات متاعها وتحلّها للتقييم المستقل، وتثني الركبة باش تجيب الموارد بعيد على جيوب التوانسة الغلابه!"
